2004年大事回顧總結

今日已經係聖誕節,第一樣要講既係"Merry Christmas to all of you !"
記得上年依個時候我身處台北,第一次自己一個人羅住地圖去旅行.
話咁快下個星期就係2005年喇,時間真係過得好快!
所以我想係度留底我係2004年所發生既大事同埋感受,
全部一一同你地分享,希望我唔會悶親你地啦!

我係今年體會到人情冷暖.當失意既時候或者需要人幫忙既時候.你就可以睇清楚依個世界有幾現實.唔理你有幾親密,有幾好朋友,最後得來既係自討苦吃!

經過依個寶貴經驗後,我學識左咩叫虛偽.明白到只有自己先可以幫自己.靠人不如靠自己,免得日比人話"你冇我你冇今日!".

有日我聽到一句刻骨銘心既說話,有人同我講"你係乞衣..............!".就係依句更加比我感覺到要靠自己既重要性.突然我諗到我D姑媽姑姐,佢地真係可以做到依一點,仲要既係佢地只靠自己能夠做得咁成功.我真係好敬佩佢地!

另一方面,我又睇到咩叫做物以類聚!人唔努力唔上進,結果只係原地"搭"步.我唔能夠容忍到一世行平路,咁樣去行我既人生!到自己變左阿婆個陣諗返起以前,原來浪費左自己既一生.咁樣做人究竟有咩意義呢?

十二月回顧

2004年12月 - 我同佢講我返學返得好開心. 佢問我點解?我只係講左句"開心咪開心羅!" 之後佢就開始擔心喇-好鬼煩成日問長問短,都唔知佢驚咩?唉!!!!!!!!

有一日要返中心做實習,好記得我個日頭部受重傷,起因就要問超人喇!我只知道一個道理"唔專心工作帶來既係意外!"

22號個日我d同學黎我屋企"反",諗起都幾好笑!!
第一件事 - 阿jin連同2磅肥牛於大賵山失蹤.
第二件事 - 話說有人自稱識得整野食,話早d黎幫手.點知去到我屋企第一句講既係"依..白色PS2播"
第三件事 - 全班同學一齊睇jackass,佢地睇得好興奮!
第四件事 - 有人讚我d蟹好食.
第五件事 - 佢話佢冇食過蟹所以有d嬲!其實佢成日都有得食架啦!唉!男人真小氣!
第六件事 - 我d同學同我講"你男朋友塊面真係好黑,攪到我地有d驚呀!"佢點解會咁?因為我d同學全部都係男仔羅!
最後一件事 - 今日又帶多左新成員返屋企喇...佢個名叫林大雄!

平安夜個日去左銅鑼灣食聖誕餐,之後係中環到數.
聖誕節個日去左尖沙咀行左一陣,夜晚去西貢BBQ.
BOXING DAY去左做義工,去緊途中比人丙.夜晚去睇"功夫"超唔好睇!

十一月回顧

2004年11月 - 我返學喇…本身都好驚自己返第二堂就唔會再返,自己知自己事.
返學識到一班新朋友,雖然佢地都細過我,但佢地都有自己既理想.
至於我呢?我到依刻都諗唔到我想要既係D咩, 我仲未搵清楚目標!
返學比我睇到D野同埋學到好多野..我覺得我學到唔單只TECHICAL既野.
我既病已經好返,我覺得自己好似一隻係森林到既雀仔,好多同伴唔再寂寞!

十月回顧

2004年10月 - 我決定唔做野,要搵D野學下.
我將有淨既錢用左去台灣. 真係激死我!!!
佢失驚無臣兩日前話去台灣.10月1-10係黃金期,好難買機票.
我搵左好多間先有機位,酒店都好貴重要好差.
台灣影婚紗相好平同埋都影得幾好.不過原來影相好辛苦架.
由下午2點影到零晨2點幾,間直係折磨.笑都笑唔出喇!
考到車牌,買左架好難?既車.

9月回顧

2004年9月- 直至老闆請左兩個人幫我手,之後我就覺得依個世界係有幾唔公平.
我問自己做得咁辛苦為咩呢?冇人會睇到你做既野, 只會比話on 居!
9/19號終於入伙喇…好好彩我係依個月中左我人生第一次既六合彩.
一共五萬幾,但我從未羅過一分一亳.
我差唔多比左一萬蚊比林太,之後比左五千蚊林老太,其餘都係用黎買野!
買左部二千五蚊既電話比細老,買左部LCD電視係房,買左張幾千蚊既床,
買左部五點一係廳.就係咁洗左一半有多喇!

八月回顧

2004年八月- 我又返新工喇,今次真係做DESIGN.
點知後來做DESIGN個部分好少,大部分都係做MERCHANT.
我做左野2年做依份工算最辛苦,晚晚都11-12點收工.
多野做到你唔信,但好奇怪就算好辛苦我都堅持第二日都要返工.
可能冇人管住我做野同埋自由D,所以都做得開心.

七月回顧

2004年七月 - 5號係我既生日,今年生日有D特別.
正因為個日我要考貨VAN,好可惜個日個考官好賤!
特登唔比我PAST,我依世都記得佢個衰樣.
個日夜晚去左R66食飯. 我既生日就係咁過喇!
第一次揪bb感覺非常開心同好得意.本身自己有情緒問題都唔得晒喇!
參加迎新會之後上training course, D BB比我感覺唔到佢地可憐,
因為得知道當有人帶佢地返屋企個陣會好幸福快樂,可能比親生父母養大更幸福.

六月回顧

2004年六月 - 自己搵到自己想做好耐既野"義工",傻下傻下登記左做義工. 就係咁我去左MOTHER CHOICE到揪BB. 之後月中我又去台灣,今次我同MAGGIE,嘉健,阿B一共4個人去玩左4日. 返黎個日仲帶左叮噹返屋企,由個日開始又多左一個新MEMBER喇!

五月回顧

2004年五月 - 4月尾5月我又開始返去荔枝角做野喇.又唔夠一個月冇再做落去.
點解會咁?個陣病得都幾利害,返工途中係可以驚到返反屋企.
感覺到壓力好大,好唔舒服.我只能夠晚晚喊,仲要突然之間喊.
個時係冇人可以明白我感受,可以話我最痛苦既時刻.

四月回顧

2004年四月 - 係依個月開始我自己搵辦法去幫自己,我已經知道我有咩問題.
係時候需要人地幫下我,所以我去睇心理輔導,依段時間係我痛苦既開始.
終於收樓喇...4/14個日係MAGGIE生日,收到律樓打黎話廿幾號可以羅鎖匙.

三月回顧

2004年三月 - 無做野,攪下攪下自己有情緒病.
個陣想過死,想過自殺,想過好多自己諗唔到既野.
例如我諗過我既然無用,不如死左去捐左我D器官出去幫下人咁.

二月回顧

2004年二月 - 因為公司改革係三月開始所有人要北上返大陸返工.
最後我選擇左唔再做喇,加上個陣又冇心機做野,最後一日留係聯泰係2月14日.
情人節-佢第一次自己訂餐廳同我慶祝,我好開心,等左差唔多五年佢終於行做D野喇!
2月23日返新工,係我惡夢既開始.係度工作時間好短.

一月回顧

2004年一月一日我同佢D朋友上大陸玩.
仲比人搵笨影左幾百蚊相,不過個過程都幾開心同影得幾好睇!
過年同佢屋企人上左常平過年,之後返到公司逗左好多錢利士.